UEFA Çempionlar Liqasının C qrupunda “Barselona” – “İnter” görüşü maraq doğurub. İtaliyada Kataloniya klubunu minimal hesabla məğlub edən “neradzurri” səfərdə də rəqibinə uduzmayıb. Hesabı meydan sahibləri açıblar. 40-cı dəqiqədə Usman Dembele fərqlənib. Digər qollar fasilədən sonra vurulub. 50-ci dəqiqədə Nikolo Barella hesabı bərabərləşdirib. Az sonra “İnter” önə çıxıb. Lautaro Martines komandasına üstünlük qazanıb. Son 10 dəqiqə dramatikliyi ilə yadda qalıb. 82-ci dəqiqədə Robert Levandovski hesabı bərabərləşdirib. Vaxtın yekunlaşmasına 1 dəqiqə qalmış Robin Qozens “İnter”i növbəti dəfə irəli keçirib. Lakin İtaliya klubu hesabı qoruya bilməyib. 2-ci hissəyə artırılan 2-ci dəqiqədə Robert Levandovski dubl edərək yekun nəticəni müəyyənləşdirib: “Barselona” – “İnter” 3:3.
C qrupunun digər matçında “Bavariya” Çexiyada “Viktoriya Plzen”i məğlubiyyətə uğradıb. Münhenlilər matçın taleyini 1-ci hissədə həll ediblər. Sadio Mane, Tomas Müller rəqibin qapısına yol tapıb. Bundan başqa Leon Qoretska dubl edib. Fasilədən sonra çexiyalılarn qollardan 2-nin əvəzini çıxıblar: “Viktoriya” – “Bavariya” 2:4. Ardıcıl 4-cü oyunda qalib gələn münhenlilər pley-offa vəsiqəni təmin ediblər. Yulian Nagelsmanın komandası 12 xalla liderdir. “İnter” 7 xalla 2-ci, “Barselona” 4 xalla 3-cüdür. Bütün oyunlarda uduzan “Viktoriya” Plzen isə sonuncudur.
D qrupunda “Tottenhem” 2 oyundan sonra qalib gəlib. “Mahmızlar” Londonda “Ayntraxt”ı qəbul edib. Frankfurt futbolçuları ilk hissədə hesabı açsalar da, fasiləyə kimi qapılarında 3 qol görüblər. Son Hyunq Min dubl edib. Harri Keyn penaltidən fərqlənib. 2-ci yarıda qonaqlardan Tuta qırmızı vərəqəylə cəzalanıb. “Ayntraxt” azlıqda qalsa da, Faride Alidu fərqi minimuma endirərək mübarizəyə nöqtə qoyub. “Tottenhem” – “Ayntraxt” 3:2.
D qrupunun “Sportinq” – “Olimpik Marsel” matçında isə qonaqlar 2 cavabsız qolla qələbə qazanıblar.Fransalılar Lissabon klubundan Rikardu Eşqayu meydandan çıxarılandan sonra fərqləniblər. Mateo Gündüzi və Aleksis Sançes diqqət mərkəzinə düşüblər. Qalan vaxtda hesab dəyişməyib. Hazırda D qrupunda “Tottenhem” 7 xalla liderdir. “Olimpik” Marsel və “Sportinq” 6 xalla 2-ci, 3-cü yerlərdədir. “Ayntraxt” 4 xalla sonuncudur.